Saumalíf

Nýtt klár

2006-06-17T00:55:00.000Z

Ég er loksins búin að stinga Mini Christmas ligths eftir MP, það gekk bara vel þegar ég var komin af stað og ég get þá strikað eitt atriði út af markmiðum júnímánaðar hjá mér.
Annars gengur rólega með annað á þeim lista, ég hef verið á kafi í að sauma The spirit of Christmas og það er frekar tímafrekt, sértstaklega eftir að ég byrjaði á loðkantinum á jólasveinajakkanum. Ég set inn myndir seinna þegar ég fæ myndatöku.

UFO klár

2006-06-08T00:40:00.000Z

UFO dagurinn í gær gekk bara vel og ég endaði á að framlengja hann fram á daginn í dag og klára blessað stykkið. Hér er árangurinn og myndin fyrir er á næsta bloggi fyrir neðan.

Ég hef verið að sauma helling með Anchor garni og mér líkar það vel, bæði er meiri glans á því og það er þjálla en DMC svo eru fallegir litir í því og oft virkar það hálfundarlega að breyta úr Anchor yfir í DMC t.d. Newton munstrunum. Ég fór að leyta og fann fínan seljanda á Ebay sem seldi mér allt settið af Anchor og síðan fann ég annan sem seldi mér box og plastspjöld undir garnið fyrir brot af því sem ég hefði þurft að borga hérna. Núna sit ég bara og læt mér hlakka til að fá þetta sent. Ég dunda mér bara við að sauma í "spirit og christmas" á meðan og gríp kannski í eitt eða tvö verkefni á markmiðalistanum líka.

UFO dagur

2006-06-06T19:05:00.000Z

Ég er að hugsa um að vera jafn samviskusöm og síðasta þriðjudag og sauma í UFO verkefni, núna er það "computer wizard at work" sem er á dagskránni og í morgun leit hún svona út.

Ég hef líka verið að sauma í "spirit of christmas" og hún leit svona út í gærkvöldi

Það er rosalega gaman að sauma þessa mynd þó að grenið sé dáldið sundurlaust að sauma.

Annars er ég ennþá tölvulaus og síðustu fréttir eru að ég fæ vélina kannski á föstudaginn, það er óþolandi að vera tölvulaus og þurfa að vera í annara vélum. Ég vil bara fá mína vél aftur "grenj" en ég verð bara að bíða róleg.

Tvö jólatré

2006-06-05T13:58:00.000Z

Ég er búin að vera tölvulaus síðan fyrir helgi, blessuð vélin mín hrundi og ég er ekki alveg viss hvað er í gangi. Annað hvort er hrundi Windowsið alveg eða diskurinn er steiktur en þetta fer að skýrast. Húni ætlar að reyna að setja hana upp aftur og ef það tekst þá er allt í lagi en annars þá þýðir þetta nýjann disk. Lyklaborðið er líka bilað svo það er nú eiginlega farið það fínasta úr blessaðri vélinni.
Ég hef annars verið á kafi í jólasaumaskap og kláraði tvö jólatré, annað svona lítið og krúttlegt á kort sem ég saumaði eitt kvöldið og sést hérna.

Hitt er ætlað á tösku eða poka sem ég ætla að sauma fyrir jólin.

Ég hef líka aðeins verið að sauma í Snapperville og það gengur ágætlega, ég er samt ekki alveg sátt við hörinn sem fylgdi með í pakkanum en vonandi verður þetta allt í lagi. Ég er líka byrjuð á enn einni jólamynd sem er búin að vera á dagskrá lengi og heitir "The spirit of chrismas" og er frá Lavender og Lace. Ég er búin með slaufuna efst í myndinni svo þetta fer vel af stað.

Jóla Jóla

2006-06-01T22:28:00.000Z

Jól í Júlí eða svona næstum því, ég var rosaleg löt að sauma eitthvað jóladúllerí í fyrra fyrir jólin en núna þá er ég í jólaskapi amk hvað varðar saumaskapinn. Þetta er náttúruleg frekar undarlegt en ég sit hérna og sauma jólakort og jólaskraut og finnst það bara fínt.
Ég fór með Guðbjörgu að sækja saumavélina hennar á Selfoss í gær og við hittum Svandísi þar í sömu erindum , til lukku stelpur með nýju vélarnar og vonandi getum við haft saumavélahitting í framtíðinni.
Eftir að ég kom heim byrjaði ég á þessari jólakortamynd og kláraði hana áðan.

Annars er ég í einskonar sumarfríi núna, krakkarnir eru hjá pabba sínum og við Hákon og Húni erum bara ein heima. Einhver gæti nú haldið að þetta væri kjörinn tími til að koma öllu í röð og reglu og þrífa heimilið hátt og lágt en ég missi alveg allt jarðsamband þegar ég er svona ein heima og nenni ekki að gera neitt. Ég er rétt hálfnuð að sortera saumadótið mitt og restin af því flæðir hér um borð og bekki, ég nenni ekki að þrífa eða elda og ligg bara í leti og sauma út.
Ég verð nú sennilega að harka af mér um helgina og koma heimilinu í samt lag því krakkarnir koma heim í næstu viku og það er svona skemmtilegra að fjarlægja amk mesta ruslið og fylla á ískapinn.

UFO klár

2006-05-30T23:51:00.000Z

Jæja loksins tókst mér að halda mig við UFO verkefni á tilætluðum degi og náði að klára tvö verkefni, annað er Kisumynd sem ég byrjaði á fyrir tveimur árum, ég breytti henni aðeins því að það sem er hvítt í myndinni átti að vera ósaumað en mér fannst það ekki koma vel út og fyllti uppí í staðinn.
Síðan harkaði ég af mér og stakk þetta pappa jólaskraut sem er búið að vera saumað síðan í fyrra og setti perlur í staðinn fyrir franska hnúta.

Ég er líka búin að klára að sauma Mini Christmas ligths og nú er bara að stinga hana, ég var ekki að fíla að sauma þessa mynd í Aida og saumaði hana í Jobelan í staðinn. Hér er myndin óstungin og það verður mikil breyting við að stinga hana, allar MP myndirnar eru eins og litaklessur þangað til maður stingur þær.

Annað klár og verk í vinnslu

2006-05-29T01:39:00.000Z

Ég hef nú aðeins tekið smá pásu frá MP myndunum og saumað annað, eitt stykkið var lítið kitt með Tom mouse sem ég fékk með einhverju blaði fyrir löngu síðan. Það er bara ansi sæt mynd svona kláruð og verður fín í kort.

Svo þegar ég var að fara yfir blöðin mín þá rakst ég á svo sæta Newton mynd og varð bara að sauma hana og er ansi ánægð með árangurinn.

Ég er líka með slatta af verkum í vinnslu og ætla að vera duglega að keyra þau áfram núna í júní, svo ég gerði lista yfir markmið júní mánaðar og hér eru þau.

Klára UFO kisuna
Klára UFO nornina við tölvuna
Klára að stinga UFO jólaskraut í pappa
Klára að stinga MP kirkjuna
Klára Mini Christmas ligths
Klára eldhúshandklæði
Klára Lickle Teddy kittið
Klára jólakortið úr pappanum
Koma Farmhouse myndinni í ca 50 %
Klára amk einn væng á álfamærinni
Klára þrjá hluta af Snapperville
Finna efni og merkja fyrir MS Twelf days of Christmas
Sauma amk nokkra spotta í ITAOAA

Það verður svo bara að ráðast hvað af þessu tekst og hvað flyst yfir í júlí.

Michael Powell klár

2006-05-29T01:16:00.000Z

Hérna eru myndir af því sem ég hef klárað síðan ég koma heim af MP myndum, að vísu átti ég eina hálfsaumaða síðan 2003 en afturstingurinn stóð eitthvað í mér. Eftir þessa törn þá gæti ég stungið þessar myndir í svefni eða svona næstum því. Ég hef alltaf keypt myndir af MP á þessum þremur sýningum sem ég hef farið á og það var komin tími til að sauma úr einhverju af þessu. Fyrst eru mini Cottages fjórar myndir , þá myni ligthhouses þrjár myndir og að lokum tvær Feneyja myndir.

Long time no blog

2006-05-26T16:05:00.000Z

Jæja ætli það sé ekki kominn tími á að blogga smá, ég er bara búin að vera svo upptekin af saumaskapnum að ég hef ekki nennt að skrifa neitt en núna er ég búin að taka myndir af því sem ég hef verið að sauma og hér eru myndir af því sem ég er búin að sauma í bútasaum í vetur.

Þessi quilt toppur var mystery quilt á http://www.quiltaholics.com en þar eru ca. fjórum sinnum á ári svona helgar verkefni þar sem vísbendingar eru birtar yfir heila helgi um hvernig á að sauma saman teppið og maður veit ekki fyrirfram hvernig það lítur út. Hálfum mánuði áður eru sett inn hvað þarf mikið af efni og hvernig á að skera það niður og svo er maður bara með þetta tilbúið þegar helgin kemur og saumar um leið og vísbendingarnar eru settar inn. Þetta er rosalega skemmtilegt og ég er búin að taka þátt nokkrum sinnum.

Þetta teppi var mystery á bútasaumlista sem ég er á og munstrið heitir Jacobs Ladder, ég saumaði þetta allt úr Thimbleberries efnum sem eru í miklu uppáhaldi hjá mér.

Þetta teppi er bjálkakofamunstur raða upp í svokallað Barn raising skipulag, ég fékk nokkur efni send sem ég var ekki neitt rosalega hrifin af en saman eru þau ansi góð.

Þetta er mystery af qulitaholics og átti að vera úr algjörlega mismunandi efnum sem tónuðu samt öll við efnið sem notað er utan um teppið.

Þetta teppi er mystery á sama lista og Jacobs ladder teppið. Þetta munstur heitir Snail Trail en er sett saman á pínulítið annan hátt en hefðbundin svona blokk.

Þetta teppi var mánaðar verkefni í Thimbleberries klúbbnum 2005, seinna teppið af tveimur í þeim klúbbi. Myndin er svolítið ljós en litirnir í þessu teppi eru mjög fallegir og gaman að sauma svona margar mismunandi blokkir í eitt teppi.

Þetta er ekki alveg fullklárað það vantar að setja á það loka bekkinn utanum teppið. Tíglarnir í þessu teppi eru saumaðir saman úr tómum afklippum, þessum sem maður hendir venjulega, ég hef verið að skoða síðuna hjá Bonnie Hunt á http://www.quiltville.com og hún er með rosalega mikið af góðum hugmyndum til að nýta afganga. Eiginlega verð ég alltaf hrifnari og hrifnari af svona "scrappy" teppum og er með nokkur í huga fyrir afgangana sem ég á eftir.
Núna er svo bara að fara að nota ofur saumavélina til að stinga alla þessa quilt toppa og klára dæmið.
Að lokum er hérna ein mynd af hjálparkokkunum við myndatökuna í action, en Hermann og Húni hjálpuðu til við að halda uppi teppunum fyrir myndatöku.

Næsti póstur verður síðan með myndum af því sem ég hef saumað í krossaumi undanfarið en ég eins og á eftir að koma í ljós hef ég verið með Michael Powell dellu.

Loksins nýtt blogg

2006-04-04T19:20:00.000Z

Jæja ég er sennilega að verða einn slappasti bloggari sem um getur, eina afsökunin sem ég hef í augnarblikinu er að A takkinn á lyklaborðinu mínu datt af um daginn og það er frekar leiðinlegt að skrifa svoleiðis.
En síðan ég skrifaði síðast er náttúrulega margt búið að gerast, til dæmis fór ég í vel heppnaða ferð til London með Hafrúnu og þar voru líka Ásta og Álfheiður systir hennar.
Tilgangurinn var að fara á handavinnusýningu en þar sem ég fór á svona sýningu í fyrra hélt ég að VISA kortið mitt yrði nánast óhult, en nei ég keypti örugglega meira en þær hinar til samans og meira að segja draslaði ég heim ferðasaumavél.
Það hefur svo sem verið draumur lengi að eignast svona vél sem er auðvelt að fara með með sér á milli staða og þessi uppfyllir alla mína drauma enda ekki nema 4 kíló, gripurinn heitir Janome Jem og virkar alveg þrælvel.
Ég endurnýjaði líka kynni mín af Michael Powell en myndir eftir hann eru ekki seldar hérna frekar en svo margt annað, en núna á ég sem sagt sennilega nánast helminginn af þeim myndum sem hann hefur gert og er meira að segja byrjuð á þessari.
Þegar ég kom heim þá fór ég að grennslast fyrir um hvort það væri séns að fá bútasaumsfót á ferðavélina þar sem ég gleymdi að sjálfsögðu að kaupa svoleiðis á sýningunni, þessi könnun hjá mér endaði á því að ég fann umboð fyrir Janome á Íslandi og það sem meira er þeir voru með draumavélina mína til sölu. Auðvitað stóðst ég ekki mátið og fjárfesti í þessari elsku sem gerir allt sem maður getur hugsað sér og meira til. Til að réttlæta kaupin þá er ég alveg að hætta að reykja og sparnaðurinn af því fer í að borga vélina eða þannig.
Síðustu helgi fór ég svo í bústað með Sissú, Eddu, Steinu og Svandísi, að vísu var ég bara á laugardeginum en þetta var alveg frábært og ég held að ég hafi fengið besta mat sem ég hef smakkað þarna enda er Sissú listakokkur.
Núna er planið sem sagt að vera dugleg að sauma í MP myndinni og ITAOAA er á hold í bili, svo náttúrulega er bútasaumurinn líka á dagskrá og ég er að nota alla afganga núna til að búa til ekta bútateppi.

Sunnudags uppfærsla á ITAOAA

2006-02-20T01:36:00.000Z

Jæja þá er kominn einn sunnudagurinn en og hér er uppfærlsan á In the armas of an angel. Ég er alveg búin að missa mig í að sauma þessa mynd og mæli með henni fyrir alla sem hafa gaman af litum.

Tvö ár í dag

2006-02-14T22:44:00.000Z

Jæja þá erum við hjúin búin að vera saman í tvö ár, algjör tilviljun að þetta ber upp á Valentínusardag en skemmtilegt samt. Ég gaf honum tvær stórar rauðar rósir og hjartalaga súkkulaði , hann gaf mér vönd af hvítum rósum alveg ótrúlega fallegum. Hann tók myndir fyrir mig af vendinum og mynd sem hann gaf mér um daginn af okkur tveimur.

Saumaskapurinn gengur vel og ég kíkti til Lindu í dag og saumaði smá með henni. Það var alveg frábært að komast út og Karítas stækkar svo hratt að það er ótrúlegt og verður alltaf meira og meira krútt. Ég ætla að halda áfram með engilinn og er með mitt eigið deadline á að klára hann en ætla ekki að gefa það upp ef ske kynni að mér tækist það ekki.

Vikulegt update á ITAOAA

2006-02-14T01:07:00.000Z

Jæja þá er komið að vikulegu update á englinum og hér er afraksturinn síðann síðast.

Nú er bara að halda vel áfram og taka góða syrpu þessa vikuna í saumaskapnum.

Klukk frá Lindu og fleira

2006-02-11T15:10:00.000Z

Linda í Allt í Kross klukkaði mig og hér eru mínir fimm ávanar:

Börnin mín stór og smá, ég gæti ekki verið án þeirra og þau gefa lífi mínu gleði og lit.
Minn heittelskaði, væri alveg ómöguleg án hans enda leitun að betri manni.
pjakkurinn minn, hann er bara ómissandi partur af fjölskyldunni
Saumaskapurinn, gæti ekki hugsað mér að sitja auðum höndum.
Bækur, þær hafa fylgt mér eins og skugginn síðan ég man eftir mér

Annars er ég búin að vera dugleg að sauma í In the arms of an angel, eftir að ég sá stykkið hjá Rósu Tom þá er ljóst að ég verð að herða mig.
Kveðjuklúbburinn hjá Láru var alveg frábær og gaman að hitta allar stelpurnar og ekki sakaði að vera boðið upp á þessar frábæru veitingar sem Lára og mamma hennar höfðu útbúið.
Hafrún smitaðist af englaáráttunni fyrir fullt og allt og ætlar að sauma ITAOAA líka en við Rósa ætlum að vera í SAL með hann.
Rósa ég legg til að Mánudagskvöld verði uppfærslukvöld á framförum í englinum, hvernig líst þér á það?
Annars er barnlaus helgi hér á bæ og við skötuhjúin liggjum í leti og höfum það gott, ég er með nýjustu Kay Scarpetta bókina í spilaranum og svo eigum við eftir að horfa á einhvern slatta af 24 þáttunum.

LOKSINS

2006-02-07T23:53:00.000Z

Vúhú loksins er pöntunin frá Silverneedle komin í hús, ég er alveg alsæl með þetta og ef það væri hægt að baða sig uppúr útsaumsdóti væri ég að því núna. Ég stefni á að setja inn mynd við fyrsta tækifæri en meðal annars eru 4 árstíðarmyndir frá Lizzie Kate, garnið í Snapperville og fjögur Mill Hill kitt.
Annars líst mér rosalega vel á hugmyndina hjá Rósu Tom að við séum í SAL með ITOOAA og mér finnst að við ættum að hafa vikulegt stöðumat með myndum. Rósa hvaða dag villt þú hafa?
En nú er 24 að byrja svo ég er farin að glápa á TV

Myndir loksins

2006-02-06T20:39:00.000Z

Loksins er ég búin að koma því í verka að fá myndatöku og hér er árangurinn.

Þessi mynd er af Christmas Stack frá Waxing Moon og vantar bara tölurnar. Það sem mér fannst skemmtilegast við þessa mynd er að ég saumaði í fyrsta skipti heila mynd með sprengdu garni. Þetta er rosalega gaman og nú er ég komin með æði fyrir myndum í þessum dúr.
Hérna er mynd af því sem ég er búin með af In the arms of an angel, að vísu eru litirnir eitthvað skrítnir en vonandi get ég látið taka mynd í dagsbirtu næst og þá verður þetta vonandi í lagi.

Bókhald, saumaskapur og annað fróðlegt

2006-02-06T18:26:00.000Z

Jæja þá er ég búin að vera að setja reikninga og annað slíkt blaðadót inn í möppu part úr deginum og ég lýsi hér með aðdáun minni á þeim sem gera þetta daglega. Þetta er ótrúlega andlaus og leiðinleg vinna og ef ekki væri fyrir ástarinnar sakir hefði ég ekki lagt þetta á mig. Maður gerir nefnilega ótrúlegustu hluti fyrir elskuna sína :-)

Saumaskapurinn gengur bara nokkuð vel og pilsið í englinum er að byrja að taka á sig mynd. Þar sem ég er með öllu óhæf í að taka myndir, þá bíða myndatökur eftir því að myndavél heimilisins og myndatökumaður skili sér í hús.
Ég var orðin svo leið á skeggi jólasveinsins í jólamyndinni að ég hef ekki ennþá nennt að setja á hana tölur en vonandi get ég hert mig upp í það fljótlega.

Í gærkvöldi var ég að horfa á hluta af fyrstu seríunni í Desperate Housewives, ég er svo aftarlega á merinni að ég er ekki búin að horfa á þann merka myndaflokk ennþá en ég verð að viðurkenna að þessir þættir eru snilld.
Bree hin fullkomna húsmóðir vekur nánast hjá mér lotningu fyrir heimilishald ef maður lítur framhjá því að fjölskyldan þolir hana ekki og aumingja mamman með alla krakkahrúguna á alla mína samúð. Ég hef nefnilega verið í hennar sporum og veit að það er ekki neitt grín, að vísu verð ég að mínusa frá minni reynslu snobbhús í úthverfi og fullar hendur fjár en það skiptir nú svo sem ekki öllu máli.

Ég bíð ennþá eftir pöntuninni minni frá The Silverneedle og vonandi fer hún að skila sér, þetta er búið að vera svo lengi á leiðinni að ég er viss um að eitthvað í pakkanum kemur mér á óvart því ég veit ekki hvað var til af því sem ég pantaði og hvort ég fæ annað svipað í staðinn.
En nú er framundan rólegt saumakvöld með góðri hljóðbók eða kvikmynd svo ég er bara hæstánægð með lífið.

Meira um barnaland

2006-02-05T22:21:00.000Z

Jæja ég frétti að bloggið mitt sé komið á Barnaland og það er bara besta mál þannig séð og ég hvet lesendur til að skrifa í komments, mér þykir heldur verra að það virðist sem þessi pistill sem ég skrifaði hafi æst upp þann einstakling sem ég skrifaði um hér að neðan.
Mér var bent á að í kjölfar þess að barnalandskonur fóru að skoða bloggið mitt þá hafi þessi einstaklingur reiðst og stofnað sérstakann lið á sínu bloggi um barnaland.

Ég leit sem snöggvast yfir þetta og ég er ekki reið, ég er sorgmædd, þarna er að finna ótrúlegust samsuðu veruleika og ýmundunar þar sem látið er líta út fyrir að hinir og þessir hafi hótað og skrifað skilaboð, það er hægur vandi fyrir þá sem þekkja eitthvað af sínum skrifum þarna að sjá að bætt hefur verið við og tekið út eftir hentugleika, eða skeytt saman ólíklegustu hlutum til að fá út eitthvað sem er aðeins í hugarheimi höfundar bloggsins. Það má flestum vera ljóst að þarna er um geðræn veikindi að ræða, ekki ætla ég að leggjast svo lágt að fara að linka á þetta og hvet alla sem lesa að halda stillingu sinni því fólk getur ekki gert að því að vera haldið sjúkdómum sama hvort sem þeir herja á líkama eða sál.

Það sem þessi einstaklingur spinnur í sínum hugarheimi hefur hvorki með mig eða Barnaland að gera og þó ég sé sár yfir að mér sé blandað inn í þetta þá geri ég meir grein fyrir að ég mun engu breyta, þar sem kurteislegum beiðnum mínum hefur verið hafnað.

Öllu verra þykir mér þó að sjá á heimasíðu þeirrar ágætu konu Láru Stefánsdóttur að hún nýtir sér veikindi þessa einstaklings til að árétta sínar skoðanir á Barnalandi. Mín vegna er Frú Láru frjálst að hafa allar þær skoðanir sem hún vill en finnst lágt lagst að vitna í máli sínu til stuðnings þá hugarsmíð sem þarna er að finna, það getur öllum sem vilja verið ljóst að Barnaland hefur hvergi komið við sögu í því hvernig veikindum þessa einstaklings er háttað.
Barnaland hefur nánast verið í umsátri frá umræddum einstakling um nokkurra mánaða skeið, þar sem notendur hafa þó yfirleitt látið viðkomandi í friði í ljósi veikinda hans.

Að notfæra sér bágindi annara og gera þá að leiksoppi er ekki fallegt og mér finnst þetta bara fallið til þess að auka enn erfiðleika og vansæld viðkomandi.

Barnaland, saumaskapur og fleira

2006-02-05T14:44:00.000Z

Ég hef nú um nokkurra mánaða skeið stundað vefinn Barnaland og þá eingöngu umræðuna sem er undir liðnum annað, sem er ætlaður fyrir aðrar umræður en þær sem tengjast beint börnum og meðgöngum þar sem ég er nú á þeim stað í lífinu að hafa hvorki ung börn eða óléttur til að ræða um.

Ástæðan fyrir að Barnaland varð fyrir valinu er að mig langaði að prófa að vera á spjallborði þar sem kynsystur mínar væru í meirhluta og ekki allt fullt af karlmönnum sem ekki hafa lært lágmarks kurteisi í samskiptum við hitt kynið.

Mér leiddist dálítið á þessum tíma og fannst þetta tilvalin afþreying. Til að byrja með þá sá ég að mér fannst töluvert af svokölluðum skítkast umræðum, en þegar ég fór að skoða betur þá kom í ljós að flestar umræður þarna voru um ýmsa dægrastyttingu og málefni líðandi stundar. Þó ég hafin engann áhuga á frægu fólki, Idoli, sápuóperum eða slíku hef ég nú samt sem áður fundið ýmislegt áhugavert til lestrar.

Af og til koma þarna inn nýir meðlimir sem virðast hafa það eitt á stefnuskránni að valda leiðindum og ausa úr þeim forarpytti sem innra með þeim býr, þetta er þó langoftast stoppað af notendum og þessi nikk hverfa til síns heima og sjást aldrei meir.

Þegar maður stundar opið spjallborð leynist auðvitað innan um fólk sem á ekki erindi á þann vettvang en því miður er erfitt að stemma stigu við því þar sem vefurinn er opin þeim sem vilja.

Í pistli á bloggi sínu í gær gerir sú mæta kona Harpa Hreinsdóttir Barnaland að umtalsefni og líkir notendum við meðvirka einstaklinga. Ég er nú ekki alskostar sammála þessu en ef við notum þessa líkingu, þá vil ég meina að það kunni ekki góðri lukku að stýra að leyfa alkanum að stórna “heimlinu” og heimilismenn þurfi jafnvel að flýja undan ofbeldi hans.

Betra er að sitja sem fastast og vísa alkanum á dyr og taka ekki þátt í framferði hans, það stjórnar nefnilega enginn alka í drykkju en aðstandendur geta stjórnað sér sjálfir og látið framferði hans ekki skemma fyrir sér.

Nafnleyndin hefur líka verið til umfjöllunar á fleiri en einum stað og mig langar að grípa í þá samlíkingu að þó maður skemmti sér á samkomu með vinum og kunningjum og þeir viti deili á manni, þá myndi maður ekki rétta ofbeldismanni sem ryddist þar inn nafn sitt og símanúmer. Enginn með fullu viti myndi bjóða uppá að slíkur maður væri að venja komur sínar heim til manns og vissi á manni full deili.

Fyrir mér þýðir nafnleynd ekki að ég geti sagt hvað sem er, heldur eingöngu verndar hún mig eða gerði það allavega fram að þessu fyrir þeim sem kjósa að vera með persónulegar árásir. Nafnleyndin þarna gerir líka konum í erfiðum aðstæðum í lífinu kleyft að bera sín vandamál upp og ná tengslum við aðrar konur sem hafa gengið í gegnum það sama.

Þar sem ég lenti í klónum á einum slíkum ofbeldissegg sem venur komur sínar á þennan spjallvef undir hinum ótrúlegustu nikkum og virðist hafa um mig ýmsar upplýsingar hef ég kosið að taka ótímabundið ekki þátt í spjallinu. Þetta geri ég til að hlífa mér og mínum við að vera útvarpað á netið undir dylgjum og róg sem eru sprottnar af annarlegum hvötum. Ég stjórna ekki því sem aðrir gera en get stjórnað sjáfri mér og það má líkja því við að ég hafi neyðst til að yfirgefa samkvæmið vegna árásar ofbeldismanns sem lætur sér ekki segjast og tekst að komast inn aftur og aftur. Þetta er að vissu leyti uppgjöf og viðurkenning á því að alkinn hafi yfirtekið heimilið en þegar maður á í höggi við þráhyggju og andleg mein þá er skynsamlegra að vægja og bíða eftir betri tíð.

Það sem stendur uppúr hjá mér eftir þessa Barnalandsveru mína er þakklæti, ég hef orðið mun auðmjúkari og gert mér betur grein fyrir láni mínu í lífinu.

Þær ber kannski ekki alltaf hæst á vefnum þessar hvunndagshetjur sem þarna eru og hafa deilt með okkur á vefnum sögu sinni og erfiðleikum. Að lesa hreinskilnar frásagnir kvenna sem hafa staðið uppi sterkari en áður eftir ótrúlegt ofbeldi, missi, veikindi og misnotkun er fyrir mér dæmi um að það er hægt að sigrast á ótrúlegustu hlutum, hvort sem um er að ræða ofbeldi, fátækt eða veikindi. Þessum konum er ég ólýsanlega þakklát fyrir að hafa deilt með mér reynslu sinni, styrk og vonum og mér finnst ég í sanni geta sagt að þeirra innlegg hafi vakið mig til umhugsunar um marga hluti.

Að lokum má ekki gleyma þeim í “heilögu klíkunni” og öðrum þeim sem hafa með sínum húmor og sprelli skemmt mér og lyft mér upp þegar ég hef verið þjökuð af leiða og kvíða. Það er stundum ágætt að sprella og spauga af lítilli alvöru þó maður sé komin á minn “háa” aldur og fær mann til að gleyma um stund leiðindum og vandmálum sem á manni hvíla.

En snúum okkur að saumaskapnum, þar sem ég hef náttúrulega ekki hangið á netinu undanfarið þá gengur In the arms of an angel bara nokkuð vel, ég er að sauma í rauða hlutann af pilsinu á kjólnum hennar og það er nú held ég leiðinlegasti hlutinn, vegna þess hversu sundurslitinn hann er.

Ég þarf líka að fara að draga upp Natures Home og sauma smá í það svo það endi ekki sem 10 ára UFO ofaní skúffu.

Leynisal og fleira

2006-02-02T22:11:00.000Z

Jæja ég er búin að vera dugleg að sauma þessa viku, er búin með jólamyndina á bara eftir að setja á hana tölur. Það reyndist frekar seinlegt að klára hana því skeggið er með wisper floss og það er reglulega slæmt að sauma með því, flækist og verður aldrei almennilegt finnst mér. Ég held ég hafi saumað skeggið amk 6 sinnum í það heila áður en ég varð ánægð. Núna þarf ég bara að pressa og setja tölurnar á.
Ég er alveg á réttu róli með Leynisal 4 og það er fyrsta leynisalið sem ég afreka það með, þetta er rosalega falleg mynd og gaman að sauma hana og nú bíð ég bara spennt eftir næsta miðvikudegi.
Ég byrjaði síðan á nýrri mynd í vikunni en það er In the arms of an angel en hún er búin að vera lengi á dagskrá hjá mér. Ég átti rétt efni í hana en það er Belfast hör 32ct sem heitir Willow green, eina sem ég hef verið að spá í er að það eru bara tvær tommur frá brún á öllum hliðum en það sleppur vonandi.

Loksins loksins

2006-01-23T17:50:00.000Z

Jæja þá er komið að því, ég er að fara að blogga aftur. Veit ekki alveg hvað skeði nema þá bara almenn lægð bæði í saumaskapnum og öllu öðru.

Ég get með mikilli ánægju tilkynnt að vera komin upp úr saumalægðinni en vantar ennþá smá tiltektarsprautu, sem þýðir með öðrum orðum að ég hef mun meira gaman af því að sauma en að taka til þessa dagana.
Ég er að sauma Christmas Stack frá Waxing Moon og það gengur mjög vel, er langt komin og það sem er skemmtilegast er að þetta er saumað með mislitu GAST garni.
Ég er líka komin með æði fyrir þessu garni og því frá Weeks Dye Works og er búin að kaupa slatta af þessu. Ég var svo lúsheppin að Hákon fór í smá ferðalag þegar hann var í Kanada og fór akkúrat í bæ þar sem var þessi fína saumabúð, ég sendi hann að sjálfsögðu með lista sem kann uppfyllti samviskusamlega.

Svo fékk meðal annars að kaupa mér saumadót í jólagjöf frá Hákoni og pantaði á gamlársútsölunni hjá Silverneedle en það bólar ekki neitt á þeirri sendingu ennþá en í henni er allt garnið fyrir Snapperville og Mill Hill kitt ásamt fyrstu nálarúllunni sem ég ætla að sauma.

Annars þá er ég að byrja í Thimbleberries klúbbnum hjá Virku og það er mjög spennandi, ég er líka að fara að setja upp hugbúnað til að hanna mín eigin blokkir og teppi og það verður eflaust gaman.
Verst að maður skuli þurfa að elda og þrífa og þvo líka en geti ekki bara legið í sauma svalli alla daga.

Annars þarf ég að vera duglegri að drífa mig út og heimsækja t.d. Lindu, ætlaði að kíkja á hana um helgina en það voru allir svo lasnir hérna að ég vildi ekki fara en bæti það upp fljótlega.
Ég afrekaði að fara í leikhús um helgina og sá Naglinn eftir Jón Gnarr sem var ansi skemmtilegt og maður fékk svona annan vinkil á reynsluheim karla eða þannig.

Myndavél heimilisins er týnd í augnarblikinu en ég set inn mynd af jólastaflanum þegar hún finnst.

Bútasaumur og meiri bútasaumur

2005-11-16T19:48:00.000Z

Núna hef ég verið alveg á fullu í bútasaumnum eftir langt hlé og fyrir utan teppið sem ég kláraði um daginn var ég að klára annað sem ég átti hálfsaumað, á eftir set ég border (man allsekki hvað þetta heitir á íslensku) utan um annað sem ég var búin að efna niður í og þá verður það búið líka. Ég er að reyna að hafa svona UFO viku í bútasaumnum og þetta gengur bara vel. Svo er ég líka að sauma Mill Hill vettlinga og er á þeim fimmta og hann er langt kominn. Mig er bara farið að sárvanta myndavél til að geta sett myndir af afrekunum á vefinn. Smá fúlt svona að geta ekki montað sig aðeins. Svo verð ég að komast í færi við einhverja góða konu sem kann að stinga svona teppi tími alls ekki að kaupa vinnu á þetta alltsaman. En vonandi getur einhver sýnt mér þetta ég veit svona nokkurnveginn hvernig þetta er gert en ég þarf bara að sjá þetta til að geta haldið áfram sjálf og svo eru þessi teppi svo stór að það er á mörkunum að þau komist í vélina mína en þetta kemur allt í ljós.

Teppið búið

2005-11-10T23:48:00.000Z

Jæja þá er bútasaumsteppið búið, þetta er svona leyni munstur svipað og í krossaumnum nema allar vísbendingarnar koma á einni helgi. Að vísu þá gerði ég þetta teppi á lengri tíma en það gerir ekki neitt til. Við Guðbjörg hittumst einn sunnudaginn og völdum ýmis efni í teppin okkar og ég er bara sátt og hlakka til að sjá hvernig hennar kemur út. Ég er búin að taka mynd af herlegheitunum en það er frekar erfitt því þetta er svo stórt. Ég þarf svo að stinga þetta við tækifæri en ég kann það ekki ennþá svo það getur orðið bið á því, þetta er sem sagt bara toppurinn óstunginn en ég get líka látið stinga þetta fyrir mig eins og ég gerði með stóra rúmteppið.

Ég er líka búin með þriðja Mill Hill vettlinginn og er byrjuð á þeim fjórða, þetta eru ótrúlega skemmtileg smáverkefni og maður er fljótur að klára einn svona vettling.

Vettlingar og skírn

2005-11-09T14:29:00.000Z

Jæja þá er ég búin með tvo Mill Hill vettlinga og er byrjuð á þeim þriðja. Markmiðið er að klára ca 6 fyrir þessi jól einn handa hverju barni og tengdabarni. Spurning um að bæta þeim sjöunda við svo litli bróðir þeirra fái líka vettling, mér finnst amk gaman að því að öll systkinin eigi eins og svo bæti ég bara við eftir því sem mér áskotnast tengdabörn.

Það var stór dagur hjá krökkunum mínum á sunnudaginn, litli bróðir þeirra var skýrður og fékk nafnið Eysteinn Örn og ég óska Jóhannesi og Siggu innilega til hamingju með nafnið á litla snáðanum.
Hér að neðan er mynd sem var tekin af öllum systkinunum í skýrnarveislunni og mér finnst þetta nú vera nokkuð góður hópur.

Annars er ég búin að vera á kafi í að sauma bútasaumsteppi, þetta er svona weekend mystery quilt sem er á einum bútasaumslistanum sem ég er á. Að vísu tekur þetta nú meira en helgi hjá mér en þokast áfram. Ég stefni á að klára ekki seinna en um næstu helgi og þá tek ég mynd af herlegheitunum.

Haustið búið

2005-11-03T16:54:00.000Z

Jæja þá er ég búin með haust myndina frá Mill Hill, það stóð að vísu autumn á hen
ni en Linda reddaði nýjum stöfum fyrir mig svo ég gat saumað haust í staðinn.

Núna er ég að byrja á Cristmas stack og vá hvað það er skrítið að sauma í efni aftur í staðinn fyrir pappa. Ég er reyndar líka byrjuð á einum Mill Hill vettling svona til að missa ekki alveg æfinguna en ég er búin að gera átta Mill Hill kitt núna í einum rikk og hef nánast bara saumað í pappa í mánuð eða meira. Það er semsagt kominn tími á að gera annað líka og ég er bara að bíða eftir GAST litunum frá Sewandso en mér finnst þeir vera svolítið lengi á leiðinni. Svo er náttúrulega afmælishittingur hjá Hafrúnu í kvöld sem ég mæti í enda alltaf jafn gaman að hitta saumafélagana úr Allt í Kross klúbbnum.

Mill Hill vandræði

2005-11-02T20:05:00.000Z

Ég er að sauma Mill Hill eins og venjulega en lenti í því að rífa pappann, þetta var 4 x 4 reitur sem fór og ég reyndi að líma bitann aftaná en það var ekki alveg að ganga. Ég átti aukapappa og prófaði að klippa út smá bút og leggja á bakvið og þá gekk þetta upp, en þetta er samt ekki alveg perfect og auðvitað er ég þarafleiðandi ekki nógu ánægð. Ég veit að það á enginn eftir að sjá þetta nema ég en vonandi gleymi ég þessu bara með tímanum.
Næst á dagskránni er að hvíla sig á Mill Hill nema kannski vettlingunum sem ég keypti, er að pæla í að sauma Christmas Stack myndina sem ég keypti í London en hún er nánast öll saumuð með mislitu garni og mig hlakkar til að prófa að sauma svona stóra mynd með svoleiðis garni, ég er bara að bíða eftir að fá þessa þrjá liti sem mig vantaði af GAST litum og þá get ég byrjað.

Myndir

2005-10-27T22:13:00.000Z

Jæja nú er ég búin með Sleigh Ride frá Mill Hill og saumaði síðustu sporin hjá Lindu í dag svo ég gæti fengið hana til að taka mynd fyrir mig. Hún tók líka mynd af Bee Squeare og hér koma þær báðar, ástarþakkir fyrir myndtökuna Linda.

Nú er ég byrjuð á haustmynd frá Mill Hill svona sem tilbreytingu frá jóladótinu og það er bara gaman að sauma með smá haustlitum.

Innkaup listi I

2005-10-23T00:21:00.000Z

jæja ég ætla að setja inn linka á munstrin og kittin sem ég keypti í London svona til að deila þessu með ykkur.

Michael Powell - Secret Garden I
Michael Powell - Mini Cottages I
Michael Powell - Pit Head
The Sweetheart Tree - Blackberry Jam
Needlepoise - Birds eye view
Lizzie Kate - Peace on Earth
Linda Myers - Quilt Sampler X
Raise the Roof - Witchy Washy
Waxing Moon Designs - Christmas Stack
Waxing Moon Designs - The most stash
Waxing Moon Designs - Three little kittens
Waxing Moon Designs - Naughty or Nice
San Man Orginals - It's laundry time
The Drawn Thread - The Brown Ranch Sampler
The Drawn Thread - Real Rose
Shepherds Bush - Come Tarry
Shepherds Bush - Winterberry Buttons
Shepherds Bush- Buttoned Yule
Bent Creek - Floss

Sumt af þessu eru kitt með öllu, með sumu fylgja bara tölur og sumt eru bara munstur. Ég er nú nokkuð ánægð með innkaupin en á eftir að láta Mill Hill listann inn en geri það fljótlega.
Ég er annars búin að vera að sauma jóladót í dag og auðvitað frá Mill Hill, nýja myndin heitir Sleigh Ride og er bara nokkuð skemmtileg í saumum.

Klári klári klári

2005-10-21T22:18:00.000Z

Jæja ég er búin að klára Bee Squeare og það er bara held ég ein flottasta Mill Hill myndin sem ég hef gert. Hún er sko ekki að njóta sín utan á pakkanum og það er alveg ótrúlegur munur að sjá þessar myndir saumaðar svona í eigin persónu heldur en á mynd. Nú verð ég að fara að skoða í pokana frá London og sjá hvað ég finn skemmtilegt, Linda er búin að stinga uppá þessari hérna og ég er með það í athugun ;-) Ég set svo inn mynd af Bee Squeare þegar ég næ í myndavél á eftir.

Hænan Henríetta búin

2005-10-21T18:09:00.000Z

Jæja það biðu eftir mér amk 100 perlur frá Mill Hill þegar ég kom heim svo ég dreif í að festa þær sem voru eftir og klára Henríettu. Ég er bara mjög ánægð með hana og langar núna í hanana frá Mill Hill á móti henni. Það voru engar svoleiðis myndir til á sýningunni en það kemur að því að ég næli mér í þá.

Núna er ég langt komin með Bee Squeare frá Mill Hill og planið er að klára það stykki áður en ég fer að sauma eitthvað af því sem ég keypti úti.

Ég á líka eftir að koma mér af stað í MS jóladögunum en ég var ekki byrjuð á þeim því ég ætlaði að kaupa efni úti sem ég og gerði. Ég ákvað að sauma þetta í svona off white opalescent Aida sem er bara ansi flott og glitrar voða jólalega.

Svo er bara að segja úllen dúllen doff þegar kemur að því að velja stykki til að byrja á. Ég ætla að birta linka á innkaupin fljótlega svo þið getið notið þess með mér.

Komin heim

2005-10-20T19:45:00.000Z

Jæja þá er ég komin heim úr reisunni og er bara hress með ferðina. Sýningin var frábær og ég eyddi að sjálfsögðu allt of miklu af peningum, ég finn bara hvernig VISA kortið mitt skelfur af hræðslu þegar ég opna veskið eftir þessa ofnotkun á því ;-)
Hér sést ég í action á sýningunni að versla

Ég keypti alveg helling af mynstrum, Mill Hill kittum, efnum og svo náttúrulega föt og jólagjafir og svona.

Að lokum er ein mynd fyrir Lindu svo hún geti öfundað mig en hér er ég að háma í mig sushi á þessum líka frábæra sushi bar, Hákon lét sér hins vegar nægja að taka mynd en hafði ekki áhuga á að borða hráann fisk.

Bee Square

2005-10-10T18:50:00.000Z

Jæja ég er búin að fá svar frá Mill Hill og sýnist að þeir ætli að senda mér perlunar eða ég vona það amk. þetta bréf er samt voða snubbótt og virkar nú ekki beint svona sannfærandi frá markaðsfræðilegu sjónarmiði en hér er bréfið:

We will forward to you, sorry.

Mér finnst nú að þeir hefðu getað svona skrifað aðeins meira professional bréf en mér er svo sem alveg sama ef ég fæ perlurnar.

En ég er sem sagt búin með hænuna fyrir utan að festa á þessar 72 perlur og ætla að byrja á Bee Square kittinu frá Mill Hill núna.
Ég á samt ekki von á að sauma neitt of mikið þangað til ég fer út því ég er svo hræðilega flughrædd að mig er farið að kvíða ansi illilega fyrir strax.

Mill Hill vandræði

2005-10-09T18:50:00.000Z

Jæja ég er búin að vera í tómum vandræðum með Mill Hill kittið sem ég er að sauma, fyrst þá gerði ég graskerið sem hænan á að liggja á of ofarlega og þurfti að rekja upp. Ég hata að rekja upp í pappa og það voru líka komnar perlur í og allt mögulegt, jæja ég lagaði það og saumaði upp á nýtt og byrjaði síðan á hænunni sjálfri og saumaði hana náttúrulega of langt til hægri. Er sem sagt búin að vera að rekja upp og laga alla helgina og hef ekki saumað neitt jóladót.

Ég þekki sjálfa mig og veit að ef ég hefði ekki barist í gegnum þetta núna þá fengi hænan að liggja ofan í skúffu forever bara. Ég fór svo að sauma jörðina sem graskerið liggur á og festa á perlur og þá kemur í ljós að það vantar hvorki meira né minna en 72 perlur í kittið. Ég skil nú kannski með eina eða tvær en þetta er nú aðeins of mikið, ég er búin að skrifa út og vona að þeir geti sent mér þetta sem fyrst.

Annars er bara kominn spenningur í mig fyrir ferðinni til London og ég hlakka svo til að fara á sýninguna og skoða og kaupa kannski smá.

Mill Hill og meira Mill Hill

2005-10-06T08:22:00.000Z

Jæja ég kláraði piparkökukallinn frá Mill Hill í fyrrakvöld og er búin að taka mynd og það eina sem er eftir er sauma textann neðst. Ég bara get ekki ákveðið mig hvað á að standa þarna og þarf líka að finna rétta stafrófið. Er að spá í gleðileg jól en finnst það samt smá svona hugmyndasnautt eitthvað. Ef einhver hefur betri hugmynd endilega láta mig vita, upprunalegi textinn er "I love Christmas" en mér finnst nú íslenskun á því frekar hallærisleg.

Annars er hætt að leka hérna og af einhverjum undarlegum ástæðum þá fóru ofnarnir að hitna um leið og lekinn hafði verið stoppaður. Ég á seint eftir að botna í svona pípulögnum en er bara kát með að það sé kominn hiti sama hver ástæðan er.

Ég var byrjuð á kitti frá Mill Hill sem heitir Henriettas Harvest núna fyrr í haust en lagði það frá mér en ákvað að taka það fram aftur og reyna að klára gripinn og hér sést stöðumynd í gærkvöldi.

Ég reyndar vakti aðeins frameftir í gær og er núna búin með maískornin og hornreitina líka og þetta er alveg verulega flott mynd. Svo er hænan henríetta í miðri myndinni og ég ætla að sauma í hana í dag. Ég er líka búin að vera dugleg að hlusta á hljóðbækur á meðan ég sauma og er núna að hlusta á London Bridges eftir James Patterson. Þetta er Alex Cross bók og hún er bara nokkuð góð þó hún sé ekki sú besta sem ég hef heyrt eftir hann. Mitt uppáhald eru "Roses are Red" og "Violets are blue" tvennan sem var hörkuspennandi. Ég heyrði líka um daginn "4th of July" eftir sama höfund sem er fjórða bókin í flokki um lögreglukonuna Lindsay Boxer og sú sería lofar góðu. Annars á ég eftir að hlusta á fullt af góðum bókum og næst á dagskránni er held ég seinni bókin um Abarat en sú fyrri var þrælgóð og ég hlakka til að heyra þessa.

Allt á floti allstaðar

2005-10-04T15:42:00.000Z

Ég var hérna heima alsæl að sauma í morgun þegar Erlendur Helgi kom heim í frímínútum og benti mér á að það læki vatn úr loftinu á baðherberginu. Ég fékk náttúrulega vægt sjokk og fór beint upp á næstu hæð og tékkaði á málunum en þau höfðu ekki orðið vör við neitt.

Ég hringdi í svo í tryggingarfélagið sem sendi pípara á staðinn og niðurstaðan er sú að það er sprungið rör í gólfinu á næstu hæð fyrir ofan og lekur niður til mín og nú er farið að leka líka inn í næsta herbergi við og sennilega inn í millivegginn á milli baðsins og herbergisins líka.
Parkettið er í stórhættu, flísarnar á baðinu í vondum málum og ég sé fram á meiriháttar vesen.
Ég vorkenni samt gömlu hjónunum á hæðinni fyrr ofan mig mest því þau eru nú ekki til neinna stórafreka og það þarf að brjóta upp hjá þeim og rífa alveg helling til að komast fyrir þetta.
Blokkin er líka heitavatnslaus og verður það þangað til að búið er að gera við og það verður nú sjálfsagt ekki vinsælt hjá sumum nöldurskjóðunum hérna.

Ég er alveg búin á þessu og það síðast sem mig langar til er að sauma í UFO svo ég ætla bara að hafa saumadekurdag núna og gera það sem mig langar til, sem eru auðvitað að sauma í Mill Hill kittið mitt en það ætti nú að klárast í kvöld ef ég fæ saumafrið.

The Rat Pack

2005-10-02T22:19:00.000Z

Jæja þá erum við búin að ákveða á hvaða söngleik við ætlum í London og það er The Rat Pack - Live from Las Vegas sem byggir á lögum Frank Sinatra, Sammy Davis Jr. og Dean Martin, þetta er alveg eðaltónlist og ég hlakka mikið til að sjá þetta.

Dagskráin fyrir London er amk að skýrast, á fimmtudeginum förum við á saumasýninguna, föstudagskvöldið í leikhúsið og á laugardagsmorguninn á Portobello Road markaðinn.

Jólalaugardagur og fleira

2005-10-02T17:14:00.000Z

Jæja þá er enn einn jólalaugardagurinn að baka, ég var nú ekki neitt rosalega dugleg að sauma í stykkið mitt en þó aðeins, er að byrja á afturstingnum og það er nú svo sem ekki neitt stórmál. Ég tók allavega stöðumynd og svo bara stefni ég á að klára næsta laugardag.

Annars er ég með á stefnuskránni að klára 3 svona fyrir þessi jól. Það er bara svo margt annað sem mig langar líka að sauma af svona jólaskrauti og er að hugsa um að sauma þrjár af kisunum sem eru frá Dimensions líka.

En ég er búin að nota tímann vel þessa daga sem ég er búin að vera veik og er búin með eitt Mill Hill kitt í viðbót. Það heitir Winter Welcome, en ég fékk íslenskun á því hjá Lindu sem var búin að búa til stafi og allt í PM svo það var bara að sauma það í og nú heitir það Snjókorn Falla sem er alveg við hæfi finnst mér. Afrekið sést hér að neðan.

Eftir að ég kláraði þetta þá byrjaði ég á einu enn Mill Hill kitti sem heitir I love Christmas en ég ætla nú að íslenska það og var bara að hugsa um Gleðileg Jól eða eitthvað svoleiðis en allar hugmyndir eru vel þegnar. Ég tók stöðumynd af gripnum og finnst ég bara vera búin með nokkuð mikið síðan í gærkvöldi enda gengur saumaskapurinn vel á meðan ég hlusta á þessa eðalbók sem ég er með í spilaranum.

Nýtt klukk

2005-10-01T16:27:00.000Z

Jæja ég hef verið klukkuð aftur og hér er afraksturinn af nýja klukkinu.

1. 7 hlutir sem að ég vil gera áður en ég dey:

Sjá öll börnin mín verða að hamingjusömu og heilsteyptu fólki
Kunna að meta augnarblikið
Ferðast til allra heimsálfa
Læra að dansa
Læra fleiri tungumál
Njóta hvers dags eins og hann er
Finna út hvað mig langar að gera þegar ég verð stór

2. 7 hlutir sem að ég get:

Saumað út
Bakað góð gerbrauð
Skipulagt hluti
Vakað frameftir
Hlegið með vinum mínum
Hlustað á tónlist
Horfið inn í bækurnar sem ég er að lesa

3. 7 hlutir sem að ég get ekki gert:

Borðað kanínukjöt
Sagt ósatt
Verið í leikfimi með tónlist
Dansað tangó
Saumað allt sem mig langar til í einu
Vaknað snemma hress og kát
Eignast fleiri börn

4. 7 atriði sem að heilla mig við hitt kynið:

Húmor
Augnaráð
Bros
Gáfur
Heiðarleiki
Líkamsburður
Staðfesta

5. 7 frægir sem að heilla

Jonny Depp
Keanu Reeves
Sean Connery
Harrison Ford
Bruse Willis
Liam Neeson
Russel Crow ( í Bautiful Mind)

6. 7 orð sem að ég segi oftast

Nei
Já
Ok
Elskan
Sweety
krakkar (þegar ég tala við allann hópinn)

Nú skora ég bara á alla sem ekki eru búinir að taka þátt í að drífa í því í hvelli.

Nýtt á nálinni

2005-09-29T02:01:00.000Z

Ég er að sjálfsögðu byrjuð á nýju Mill Hill kitti eins og ég minntist á og það er snjókarl sem stendur við jólatré. Ég tók mynd af því sem komið er og er bara sátt við árangurinn fram að þessu. Annars er ekki mikið að frétta hér úr veikindabælinu, ég og Hulda erum veikar núna en ég er að hressast og er amk farin að geta saumað meira enda fátt betra þegar maður er ekki til neinna stórræða. Hljóðbókin sem ég talaði um í blogginu í gær er líka alveg frábær og varla að maður tími að slökkva á henni.

Mynd af Mill Hill - Keep Warm

2005-09-29T01:54:00.000Z

Jæja loksins fékk ég myndavél og tók mynd af Mill Hill stykkinu sem ég var að klára í gær.
Er nokkuð stolt af árangrinum en því miður er myndin léleg hjá mér.

Tóm leiðindi

2005-09-26T23:21:00.000Z

hér á bæ, ég er lasin með lungnabólgu og astma og er langt í frá hress með þetta. Hef lítið saumað og jólalaugardagurinn fór fyrir lítið. Ég hafði bara jólasunnudag í staðinn og kláraði allt nema afturstinginn á snjókallinum, set inn mynd þegar ég kemst í myndavél.

Núna er ég að sauma smá í Mill Hill myndina og á ekki mikið eftir og er búin að velja mér aðra til að byrja á þegar hún klárast. Núna kemur sér semsagt vel að eiga svona birgðir af saumadóti til að grípa í þegar maður er lasin og kemst ekki í búð og ef það er ekki góð ástæða fyrir svona neyðarlager þá veit ég ekki hvað það er.

UFO dagurinn er á morgun og ég ætla að vera með og byrja á að rekja upp það sem ég var búin að sauma af kettinum og byrja á honum uppá nýtt. Ég hef aðeins verið að spá í að bæta við aftursting í myndina mér finnst eins og það vanti smá en sé til hvernig hún lítur út fullsaumuð áður en ég ákveð mig.

Ég er líka aðeins búin að vera að fikta í blogg sniðinu mínu og bætti til dæmis inn svona progress bar eins og ég sá hjá Rósu Bjarna. Finnst þetta algjör snilld og það er hægt að sækja kóðann hingað

Næstu daga ætla ég bara að liggja heima, hlusta á hljóðbækur og sauma út, ég er núna að hlaða niður Tyrannosaur Cannyon eftir Donald Preston . Þetta er svona Sci Fi mystery með helling af hasar eða eins og einn lesandi sagði í ritdóm á Audible.com "Dinosaurs, DNA, cryptic code, intrigue, religion, secret ops and bad guys coming out every which way" ég er alveg að fíla þetta og er bara nokkuð spennt fyrir að byrja að hlusta.

Jólalaugardagur - verkefni dagsins

2005-09-24T14:30:00.000Z

jæja þá er kominn laugardagur enn og aftur og þá er saumaði í jólastykki í saumaklúbbnum mínum Allt í Kross. Ég er að sauma í jólaskraut frá Dimensions, þetta eru sex stykki í pakka og ég er að sauma fyrsta stykkið sem er snjókarl. Staðan í byrjun dags er hérna á myndinni hér að neðan og verður gaman að sjá hvað ég get klárað mikið í dag.

Ég ætlaði náttúrulega til Lindu í dag en er með hálsbólgu dauðans og efast um að ég fari út úr húsi um helgina. Ég var búin að hlakka til að sjá litlu dúlluna þeirra Lindu og Mio og hitta hinar í saumó en maður reynir bara að líta á jákvæðu hliðarnar og ég á t.d. örugglega eftir að sauma meira en venjulega um helgar.

Nýtt UFO stykki

2005-09-23T12:18:00.000Z

Ég er búin að velja mér nýtt UFO stykki og hér er mynd af því að vísu ekki góð en dugir. Ég á bara eftir að sauma köttinn og afturstinginn svo þetta ætti ekki að taka langann tíma. Annars ætla ég að vera dugleg að sauma á jólalaugardegi á morgun og vona bara að ég verði orðin svo frísk að ég komst til Lindu en vil ekki fara ef ég verð ennþá lasin svo ég smiti ekki krílið.

UFO mynd

2005-09-23T03:31:00.000Z

Ég komst loksins í myndavél til að taka mynd af UFO stykkingu sem ég kláraði á þriðjudaginn og hér er árangurinn:

Aðstoð við saumana

2005-09-23T02:34:00.000Z

Ég hef fengið ansi góða aðstoð við saumana undanfarið, kisi minn hann Pjakkur er voða spenntur og situr stíft hjá mér á stólarminum og horfir á mig sauma. Hann er kannski að bíða eftir að ég missi niður fleiri perlur sem hann getur elt um gólfin.
Hann er reyndar orðinn 10 ára og algjörlega ofdekraður en við elskum hann öll og kippum okkur ekki upp við það þó hann veki okkur á næturnar þegar hann vantar klapp.

Slappur saumadagur

2005-09-23T01:36:00.000Z

Jæja þetta hefur verið slappur saumadagur hjá mér eiginlega, hef lítið gert nema sauma smá í Mill Hill enda verið lasin og ómöguleg bara.
Ég er samt að vinna í ennþá að sortera saumadótið mitt og bæta inn á sölusíðuna mína á yahoo, ég held að það sé gott að hreinsa svona til öðru hverju og losa sig við það sem maður veit að maður kemur ekki til með að sauma. Á reyndar eftir að taka mynd af stórum jólaboðdúk sem er mjög fallegur hef bara ekki þolinmæði í hann held ég. Eins datt mér í hug hérna um árið að sauma svona pallíettu filtdúk, ég komst ekki eins sinni svo langt að opna hann svo best að hann fari líka.
Eina skemmtilega sem ég gerði í dag var að horfa á Manchurian Candidate sem er ágætis mynd og alveg svona þörf áminning um að það er ekki allt sem sýnist.

Klukk klukk klukk

2005-09-22T20:21:00.000Z

Jæja Sveina klukkaði mig og ég þarf að grafa upp einhverjar fimm staðreyndir um mig og hér koma þær:

1. Ég er handavinnufíkill en það er nú kannski sjálfgefið miðað við þetta blogg, ég elska að sauma út og þarf helst að hafa mörg stykki í takinu. Þetta hefur nú nánast leitt til vandræða en UFO dagarnir í saumaklúbbnum mínum eiga vonandi eftir að verða til að ég klári eitthvað.

2. Ég hlusta töluvert á tónlist, það sem fólk veit ekki er að ég hef undarlegann tónlistarsmekk og er til dæmis veik fyrir karlakórs söng og laumast líka til að hlusta á Julio Iglesias svona stundum. Alan Jackson er líka eitt goðið sem ég hlusta á og ég er sérlega hrifin af laginu It's five o'clock somewhere sem er bara snilld og myndbandið ekki síðra. Annars er Muse uppáhaldið mitt og ég get endalaust haft þá í spilaranum.

3. Ég á fimm börn eins og allir sem þekkja mig vita, það sem fólk veit hinsvegar ekki er að ég hef ekki neitt rosalega gaman af börnum. Mér finnast náttúrulega ungabörn sæt og allt það, en er alveg lens ef ég er skilin eftir með krakka á aldrinum 5 - 11 ára til dæmis, ég hef ekki hugmynd um hvað ég á að tala um við þau. Unglingar eru allt annað mál og ég hef alltaf haft gaman af þeim og finnst þeir upp til hópa frábærir.

4. Mér finnst gaman að horfa á Kínverskar bíómyndir, af hverju það er hef ég ekki hugmynd en það er bara eitthvað við þær sem ég er að fíla. Ég hef aldrei séð Titanic og er mjög ánægð með það mér finnst bara akkúrat ekki neitt rómó við að draumaprinsinn krókni úr kulda og drukkni. Ég er líka mikið fyrir Sci Fi myndir og þætti og að sjálfsögðu er Matrix serían í uppáhaldi og Babylon 5 þáttaraðirnar líka.

5. Ég er lélegur kokkur sem er ekki gott þegar maður er með stóra fjölskyldu, ég bara hef nákvæmlega ekki neitt hugmyndaflug í eldhúsinu og vil helst eyða sem minnstum tíma þar. Stefnan hefur alltaf verið að lauma mér á eitthvað gott matreiðslunámskeið en það hefur ekki orðið af því ennþá en ef ekki verður af því þá bara reyni ég að komast hjá að eitra fyrir mannskapnum og elda svo bara með símanum þegar börnin verða flutt að heiman.

Úff nú vitið þig mikið meira um mig en þið vilduð, en nú er komið að mér að klukka fimm aðra bloggara og ég klukka Rósu Bjarna, Hrönn, Ingibjörgu Huldu, Rannveigu Lenu og Hafrúnu, þær eru allar í saumaklúbbnum mínum Allt í Kross.

Til hamingju Rósa

2005-09-22T20:10:00.000Z

Hún Rósa Tom í saumaklúbbnum mínum Allt í kross eignaðist litla snúllu í morgun, ég óska þeim Rósu, Davíð og Þorbjörgu Eyju innilega til hamingju .

Ég er búin að sjá að það er engin ástæða til að halda að saumaklúbburinn leggist af þó við verðum gamlar og fótafúnar. Í ár eru bæði Linda og Sonja búnar að eignast stelpur og svo eiga vonandi fleiri eftir að bæta við sig stelpum.
Ég reikna fastlega með að þær feti í fótspor mæðra sinna í saumaskapnum og gangi svo í klúbbinn þegar þær hafa aldur til og geta þá aðstoðað okkur gömlu skörin við að komast í hitting :-)

Ótrúleg óheppni

2005-09-21T15:37:00.000Z

Jæja ef einhverjum langar að vita hvernig það er að týna fulla krukku af litlum Mill Hill perlum upp af gólfinu þá get ég segt viðkomandi að það er EKKI gaman.

Ég var sem sagt hérna í góðum fíling að sauma og hlusta á hljóðbók þegar ég fékk þá snilldarhugmynd að standa upp og fá mér kók. Gleymdi hins vegar alveg að krukkan með perlunum var á stólarminum, ég bara horfði á perlurnar skoppa um allt gólf og hugsaði "þetta er ekki að gerast" en jújú þetta var sko heldur betur raunverulegt og ég er sem sagt búin að vera í klukkutíma að sópa og týna perlurnar upp af gólfinu.
Er eiginlega ekki búin að jafna mig alveg og það var ekki til að bæta ástandið að Pjakkur vildi endilega hjálpa mér.

Ég er annars að hlusta á The Undomestic Godess, þetta er svo sem allt í lagi bók en byggir á þessu gamla þema að kona á framabraut lendir í aðstæðum þar sem hún þarf að læra að takast á við heimilishald og finnur ástina í leiðinni eða svona hér um bil.
Hef svona aðeins velt því fyrir mér hvort leiðin til sannrar lífshamingju felist í alvöru í því að kunna að baka og skúra, en hvað veit ég svo sem.
Kannski best að skella í eins og eina köku og sópa upp restinn af perlunum og athuga hvort ég verð ekki bara svona "instant" hamingjusöm.

Tóks að klára....

2005-09-21T00:05:00.000Z

Jæja mér tókst að klára UFO stykkið mitt í dag gat ekki tekið mynd en bæti úr því fljótlega. Núna verð ég að finna mér annað, það er svo sem ekki vandamál það eru til nokkur ókláruð verkefni ofaní skúffum.
Ég saumaði líka í Mill Hill myndina mína og hér er staðan á henni í kvöld

Þessi mynd er bara ótrúlega skemmtileg í saumum og ég verð vonandi ekki lengi að klára hana. Ég veit ekki hvort ég er svona rosalega mikill þjösni en ég beygi allar perlunálarnar nánast í vinkil um leið og ég byrja að nota þær. Ég þurfti að fara og kaupa mér aukanálar hjá Guðbjörgu í Völusteini í dag og auðvitað þurfti ég að skoða Mill Hill jólaskraut og fékk mér einn vettling til að sauma svona einhverntíma í framtíðinni.

Annars er ég að fara á saumasýningu í London eftir þrjár vikur og hlakka ekki neitt smá til, ég fór á þessa sýningu fyrir tveimur árum með þremur öðrum úr saumaklúbbnum og það var ótrúlega gaman. Ég er nokkuð viss um að ég á eftir að eyða alltof miklum peningum þarna en það verður bara að hafa það, á óskalistanum er meðal annars saumastandur og mig minnir að það hafi verið gott úrval af þeim síðast. En ég er líka veik fyrir allskonar samplerum og á örugglega eftir að bæta nokkrum í safnið núna eins og ég gerði þá en hvernig gengur að sauma þá er svo önnur saga :-)

UFO dagur

2005-09-20T13:56:00.000Z

Alla þriðjudaga eru UFO dagar í saumaklúbbnum mínum, mér hefur nú tekist með lagni að komast hjá að klára neitt, en nú verður vonandi breyting á.
Ég er semsagt búin að finna munstrið af stykkinu sem ég ætlaði að klára svo nú hef ég enga afsökun lengur. Ég á ekki mikið eftir en þetta hefur vafist ótrúlega fyrir mér að klára þetta. Upphaflega átti þessi mynd að vera búin áður en ég flytti inn í Engihjallann en ég náði ekki að klára hana í tæka tíð.
En núna sem sagt ælta ég að bretta upp ermarnar og vona að allt gangi vel, ég er aðeins stressuð yfir kögri sem ég þarf að gera á trefil en Linda var búin að sýna mér hvernig þetta er gert og ég vona að ég muni það ennþá.

Fyrsta tilraun til bloggs

2005-09-20T02:09:00.000Z

Jæja þá er ég komin með blogg eins og allir aðrir! Vona að þetta hjálpi mér til að halda utan um handavinnuna hjá mér og ég verði dugleg að skrifa hérna inn einhverjar ódauðleg ummæli :-)
Ég kláraði á laugardagskvöldið jólamynd frá Mill Hill, þetta er fyrsta kittið sem ég sauma frá þeim og ég er vægast sagt hrifin. Að sjálfsögðu naut ég góðrar leiðsagnar frá Guðbjörgu og hefði sjálfsagt lent í ansi mörgum óþarfa gildrum ef hennar hefði ekki notið við. Hér að neðan er mynd af árangrinum.

Nú er ég byrjuð á öðru kitti og það er svona jóla vetrarmynd frá Mill Hill að sjálfsögðu ég er búin með rammann utanum hana og hornin og byrjuð á húfum sem eru efst í myndinni. Ég er ansi spennt fyrir þessari því hún er með sporum sem ég hef aldrei séð áður og mér finnst gaman að auka svona við þekkinguna. Ég ætla að reyna að setja inn frammistöðu mynd þegar ég næ taki á myndasmiðnum hér á bæ en hér er mynd af pakkningunni svona til að sýna hvernig hún lítur út. Þessi mynd er nú ekki alveg nógu góð en dugir í bili.

Vona bara að ég nái því að setja inn mynd á morgun af því sem ég er búin að gera.